პოლიტიკა

იუსტიციის მინისტრად რატი ბრეგაძე დაინიშნა

image
  • Google
  • 95
  • 3 კვირის წინ

იუსტიციის სამინისტროში გოჩა ლორთქიფანიძეს რატი ბრეგაძე შეცვლის.

იუსტიციის ახალი მინისტრი მთავრობის სხდომაზე პრემიერ-მინისტრმა ირაკლი ღარიბაშვილმა წარადგინა.

როგორც პრემიერ-მინისტრმა აღნიშნა, რატი ბრეგაძე არის მაღალი კვალიფიკაციის იურისტი.

„რატი ბრეგაძე ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის დამთავრების შემდგომ სწავლობდა ჰამბურგის უნივერსიტეტში, სადაც მოიპოვა სამართლის მაგისტრისა და სამართლის დოქტორის სამეცნიერო ხარისხი. 2012 წლიდან რატი ეწევა პედაგოგიურ საქმიანობას და არის კავკასიის უნივერსიტეტის პროფესორი. ასევე, მინდა ვთქვა, რომ 2012 წლის ნოემბრიდან დღემდე სხვადასხვა პერიოდში ეკავა სპორტისა და ახალგაზრდობის საქმეთა მინისტრის მოადგილის, განათლების საერთაშორისო ცენტრის დირექტორის მოადგილის, დიასპორის საკითხებში სახელმწიფო მინისტრის მოადგილის, საგარეო საქმეთა სამინისტროს დიასპორასთან ურთიერთობის დეპარტამენტის ხელმძღვანელისა და თავდაცვის მინისტრის მოადგილის თანამდებობა. რატი იყო სახელმწიფო საკონსტიტუციო კომისიის წევრი“, – განაცხადა ირაკლი ღარიბაშვილმა.

რატი ბრეგაძემ იუსტიციის მინისტრის თანამდებობაზე გოჩა ლორთიფანიძე შეცვალა, რომელიც ჰააგის სასამართლოს მოსამართლედ აირჩიეს.

„გოჩა ლორთქიფანიძე მიემგზავრება ჰააგაში. გუშინ იყო მისი ბოლო სამუშაო დღე. მინდა, კიდევ ერთხელ გადავუხადო გულწრფელი მადლობა და ვუსურვო წარმატება“, – აღნიშნა ღარიბაშვილმა.