"2008 წლიდან რუსეთი ოკუპაციის ხარჯზე გავლენის სფეროს გაფართოებას ცდილობს საქართველოში, იმავე პროცესს ვხედავთ უკრაინაშიც"
loader

Breaking news

"2008 წლიდან რუსეთი ოკუპაციის ხარჯზე გავლენის სფეროს გაფართოებას ცდილობს საქართველოში, იმავე პროცესს ვხედავთ უკრაინაშიც"

  • 2008 წლიდან რუსეთი ოკუპაციის ხარჯზე გავლენის სფეროს გაფართოებას ცდილობს საქართველოში იმავე პროცესს ვხედავთ უკრაინაშიც

თბილისი: ევროპისა და ევრაზიის საკითხებში აშშ-ის სახელმწიფო მდივნის თანაშემწის მოვალეობის შემსრულებელი ფილიპ რიკერი დიპლომატიური კორპუსის რამდენიმე წარმომადგენელთან და უსაფრთხოების ექსპერტებთან ერთად სოფელ ოძისში ჩავიდა.

ამერიკელმა დიპლომატმა აღნიშნა, რომ რუსეთის მიერ საქართველოს ტერიტორიის მეხუთედის ოკუპაცია ამერიკის შეერთებულ შტატებში დიდ შეშფოთებას იწვევს.

"ამერიკის შეერთებულ შტატებსა და საქართველოს ერთმანეთთან ხანგრძლივი პარტნიორობა აკავშირებთ. საქართველოს ოკუპირებულ ტერიტორიაზე რუსი სამხედროების განლაგება დიდ შეშფოთებას იწვევს, ისევე, როგორც მათ მიერ ე.წ. ბორდერიზაციის პროცესი და ამ პროცესთან დაკავშირებული ქმედებები. ამერიკის შეერთებულმა შტატებმა რუსეთის ხელისუფლებას არაერთხელ მოუწოდა, შეწყვიტოს უკანონო ქმედებები და უკან გაიწვიოს ჯარები საქართველოს ტერიტორიიდან. ჩვენ მოვუწოდეთ, შეწყვიტონ საქართველოს ოკუპაცია და დაემორჩილონ 2008 წლის შეთანხმებას“, – განაცხადა ფილიპ რიკერმა.

რიკერი მიიჩნევს, რომ საერთაშორისო დელეგაციის ვიზიტი აღნიშნულ ტერიტორიაზე ძალიან მნიშვნელოვანია. მან ადგილზე ჩასული დელეგაციის წევრებს მადლობა გადაუხადა.

"ევროპის ეს ნაწილი ძალიან მნიშვნელოვანია ჩვენთვის. ჩვენი მიზანია, ოკუპაცია დასრულდეს. მით უმეტეს, ეს სასიცოცხლოდ მნიშვნელოვანია საქართველოს მოსახლეობისთვის. აქ მცხოვრებ ხალხს გადაადგილების კუთხით პრობლემები ექმნებათ და საქართველოს მეგობარი და პარტნიორი სახელმწიფოსთვის, როგორიცაა ამერიკის შეერთებული შტატები ეს შემაშფოთებელია“, – აღნიშნა ფილიპ რიკერმა.

ამერიკელი დიპლომატის თქმით, უკრაინაში მიმდინარე მძიმე პროცესები, როგორიცაა აღმოსავლეთ უკრაინის ოკუპაცია და ყირიმის ანექსია, ისევე როგორც საქართველოს ტერიტორიის ოკუპაცია, არის რუსეთის მცდელობა, გააფართოოს გავლენის სფერო და შეარყიოს ევროპის სტაბილურობა.

"რუსეთის ხელისუფლების მხრიდან გავლენის გავრცელების ტაქტიკა დიდი ხნის წინ გამჟღავნებული მოვლენაა. ამავე ტაქტიკის დასტურია საქართველოს ოკუპირებულ ტერიტორიაზე აშენებული სამხედრო ბაზაც, რომელიც რამდენიმე კილომეტრში მდებარეობს ამ ადგილიდან. შეუიარაღებელი თვალითაც ჩანს, რომ აქ რუსეთის დროშა ფრიალებს. 2008 წლიდან დღემდე რუსეთი ოკუპაციის ხარჯზე გავლენის სფეროს გაფართოებას ცდილობს საქართველოში. იმავე პროცესს ვხედავთ უკრაინაშიც და ვხედავთ, რომ უკანასკნელი 10 წლის განმავლობაში რუსეთი მისი უკანონო ქმედებებით ცდილობს, შეარყიოს ის, რასაც სტაბილური და მშვიდობიანი ევროპა ჰქვია“, – აღნიშნა ფილიპ რიკერმა.

ევროპისა და ევრაზიის საკითხებში აშშ-ის სახელმწიფო მდივნის თანაშემწის მოვალეობის შემსრულებლის ფილიპ რიკერის ვიზიტის ფარგლებში დაგეგმილია შეხვედრები საქართველოს მთავრობის წევრებთან, მათ შორის ახალ პრემიერ-მინისტრ გიორგი გახარიასთან. 

"ეს ჩემი პირველი ვიზიტია საქართველოში. სახელმწიფო მდივანმა მაიკ პომპეომ მთხოვა, ჩამოვსულიყავი და შევხვედროდი ახალ პრემიერს, აგრეთვე მოვსულიყავი ადმინისტრაციულ გამყოფ ხაზთან, სადაც როგორც ვხედავთ, ადგილობრივ მოსახლეობას მშვიდობიანი ცხოვრება გართულებული აქვს", - აღნიშნა რიკერმა.


იყავით მიმდინარე მოვლენების საქმის კურსში!
მოიწონეთ ჩვენი არხი Telegram-ზე