საქართველოს პრეზიდენტმა აშშ-ში სამუშაო ვიზიტი დაიწყო
loader

Breaking news

საქართველოს პრეზიდენტმა აშშ-ში სამუშაო ვიზიტი დაიწყო

  • საქართველოს პრეზიდენტმა აშშ-ში სამუშაო ვიზიტი დაიწყო

ნიუ-იორკი: საქართველოს პრეზიდენტი გიორგი მარგველაშვილი ნიუ-იორკში გაერო-ს ღონისძიებების ფარგლებში გამართული კონფერენციის „მშვიდობისა და განვითარების შენარჩუნება ცვალებად სამყაროში“ უმაღლესი დონის დისკუსიაში მონაწილეობას მიიღებს, რომელიც ტრანსატლანტიკური სივრცის მომავალს და ჩრდილოანლანტიკური ალიანსის გაფაროების პერსპექტივებს უკავშირდება.

საქართველოს პრეზიდენტის ვიზიტის მთავარი თემა საქართველოს უსაფრთხოება, საქართველო-ამერიკის შეერთებული შტატების ურთიერთობების განვითარების ხელშეწყობა და საერთაშორისო უსაფრთხოების დაცვაში საქართველოს, როგორც ალიანსის საიმედო პარტნიორის განსაკუთრებული წვლილის ხაზგასმა იქნება.

პრეზიდენტის საერთაშორისო მდივნის თენგიზ ფხალაძის განცხადებით, უმაღლესი დონის დისკუსიისას საუბარი შეეხება საქართველოსთვის უაღრესად აქტუალურ საკითხებს ქვეყნის უსაფთხოების, ოკუიპირებული ტერიტორიების და ზოგადად ტრანსატლანტიკური თანამშრომლობის მომავლის შესახებ.

პრეზიდენტს, ვიზიტის ფარგლებში კომუნიკაცია ექნება თავის კოლეგებთან. დღეს გიორგი მარგველაშვილი სლოვაკეთის პრეზიდენტთან ანდრეი კისკასთან გამართავს შეხვედრას.

გიორგი მარგველაშვილი დღეს ასევე ამერიკული ფონდის “Appeal of Conscience Foundation” მიერ ორგანიზებულ ყოველწლიურ საზეიმო მიღებას "2018 Annual Awards Dinner" დაესწრება, რომელიც უმაღლესი რანგის სტუმრებისთვის იმართება.

წლევანდელი ღონისძიება საერთაშორისო სავალუტო ფონდის ხელმძღვანელის კრისიტინ ლაგარდისა და საფინანსო ორგანიზაციის „რიჩმონტი“ თავმჯდომარის ჯოან რუპერტის პატივსაცემად იმართება, რომელსაც მადლენ ოლბრაიტი, ჰენრი კისინჯერი, ჯეიმს ბეიკერი, კოლინ პაუელი და სხვა ცნობილი პოლიტიკური მოღვაწეები, კონგრესისა და სენატის, ასევე ბიზნესის წრეების წარმომადგენლები დაესწრებიან და მოწვეულ სტუმრებს სიტყვით მიმართავენ.

დაგეგმილია ასევე საქართველოს პრეზიდენტის ინტერვიუები საერთაშორისო მედიასთან.


იყავით მიმდინარე მოვლენების საქმის კურსში!
მოიწონეთ ჩვენი არხი Telegram-ზე